Da la Bassa Padovana

Có nasìvino a dotrina
Breve cronaca de le nostre domèneghe

A l’incrocio co ’l Borgheto, a ghe jera el gelataro da Casale co ’l careto a tre roe…

Co ’na caròbola a te rosegavi par mezo chilometro in bicicleta…

La messa a la doménega matina, coela de i zóvani de le nove, la jera imancàbile, ma ’na volta finìa bisognava ciapare subito la bicicleta e nare a casa; non se podéa fermarse co i amizzi parché a ghe jera da finire i cònpiti par casa e studiare el Catechismo par el dopodisnà.
Dopo le solite tajadele in brodo, el polastro, le patate e la torta Margherita, a jera ora de pareciarse par nare a la scola de Dotrina Cristiana.
E lì a ghe naséa pi volentieri, parché me nona, prima de partire, la me faséa la mancia de diese franchi, ca, manco a dirlo, li spendéa tuti! Có scominziava el caldo a naséa via zincoe minuti prima parché, a l’incrocio co ’l Borgheto, a ghe jera el gelataro da Casale co ’l careto a tre roe, co on gran gelato disegnà de fianco al serbatoio de i gelati che el paréa la ponta de ’na barca, i coni fati de cialda gudi de sora e on coerto de tela par fare onbra.
Con diese franchi a se podèa sèliere tra on gelato pìcolo, o du oncora pi pìcoli da zincoe franchi l’uno. Gnanca parlàrghene ca seliéa i du da zincoe, cossì con tre lecadine a finìa el primo, ma dopo a me restava chel’altro, e intanto a me avicinavo pian pian a la Casa de la Dotrina, difronte a la cesa, indove ca ghe jera a spetarne el pàroco, don Salvatore, ca ghe ciamàvino “el prete grosso” (imagineve parché!), che ’l controlava s’a ghe jèrino tuti, e guai a mancare!
Intanto a nasìvino so la nostra aula con el maestro che prima el ne interogava e dopo el spiegava la nova lezion. Prima de nare fora bisognava dire ’na preghiera tuti insieme con don Salvatore, o con don Luigi el capelan, e dopo a catàvino, fora de la porta, “Leo e la Gobeta” co ’l bancheto con le roe de bicicleta, na spece de caretin, pien de ciucioti, caramele, stracaganasse, fava e caròbole. Ogni bendedìo par noantri toseti, robe ca non ghe jera a casa nostra, ma se gavìvino speso i schei par el gelato a se contentàvino de vardare.
Ma coando che el gelataro no ’l vegnéa in te ’l nostro paese par via che non jera pi caldo, alora a fasìvino spesa da “Leo e la Gobeta”: co ’na caròbola a te rosegavi par mezo chilometro in bicicleta, con diese franchi de stracaganasse a te rivavi a metà strada, i ciucioti de tiramola i durava fin al “capitelo de San Galo”, invezze co diese franchi de caramele a te jeri de pi contento parché Leo el t’in daséa coatro. Coatro caramele in scarsela le te faséa sentire sior e te ghin portavi anca a casa, ma le jera caramele trucà. Leo el naséa a far spesa de caramele da Costa, a Montagnana, e có ’l rivava a casa, insieme a la mojere, la Ines, deta “Gobeta” (parché a lo imaginè!), i descartozzava le caramele che le gavéa dó carte, i le tajava a metà e dopo i le inscartozzava metà con ’na carta e metà con chel’altra. Cossì i ne contentava par i pochi schei ca ghìvino.
Dopo tornàvino a casa, spetando la mancia de la doménega dopo, sicuri de catare “Leo e la Gobeta” co ’l so bancheto pien de roba ca non ghe jera a casa nostra!

[torna sopra]