Da Mestre-Venezia

Dialeto rufian

Revine, Lama de le Crode: la ceseta de la Madona de la Neve.

La piera che ricorda Nando e Maria.

La casa de Nando e Maria, co l’albarà de le sarese e veduta de i Laghi de Revine.

Gnanca el tenpo de métar via tuti i strafanti del Nadal che inpeniva le vetrine de le boteghe e frastornava e orbava i oci co tuto el slusegar de ori e lucete, che eco, ben par tenpo postar in bela mostra un desìo de intrighi e bonboni da donar a San Valentin. Mi me torna in mente che me nona mensonava ’sto Santo quando che no stavo ferma e la me diseva: “... Ma cossa fastu, el balo de San Valentin?...”
Questo parché San Valentin gera e xe el Santo sora el malcaduco, però xe più belo pensarlo come el Santo sora i morosi e anca sora tuti queli che se vol ben; de conseguensa soratuto i tosi inamorài serca calcossa da regalar, co gran contentessa de fioristi, pasticeri e botegheri vari. Mi go caro ricordar in sta ricorensa copie che ga mostrà un amor special, amor scrito nel destin, come quelo de Nando e Maria, par esenpio.
Questa de Nando e Maria xe una de le storie che me ga contà el vecioto che go conossùo có so’ ’ndà a védar la ceseta de la Madona de la Neve, sora i laghi de Revine, fata costruir da Don
Luigi Chiarel par recordar so fradelo, quelo che ghe ne fea pi de Bertoldo.
Segnando co un déo ’na casa poco più in su, el ga tacà a contar ’sta storia:
“La varde là via, oltra la ceseta, ghe n'è la casa de Maria e de Nando; no la era cussita, ’lora che Maria la era céa, la era poc pi de un tabià, ghe n'era la stala, l'ort, e tante àlbare. L'era de majo, Nando che l'era un scavessot de dódese ani e che stéa co la so fameja poc pi in sot, el tendéa la zharesara, e na olta maure le zhariese, de scondion l'è ’ndat a ciordarle; ma, se sa, anca la Maria la tendéa la so àlbara e incòrtase del Nando, la è corsa tuta ingrintada, osando e bravando al ladro. Mario da sora la zharesara, l'à ridest de piena boca, e co el so muso de tola el dis a la Maria che in canbio de le zhariese, na olta omo la sarèe stada la so sposa. Nosse par un pugnet de zhariese!
Maria e Nando i s'à senpre vardà co l'ocio del prefassio, po’ na olta cressesti i se à pers de vista, ela l'era ’ndata co altre tose a laorar distante, l'era el tenpo de i nostri migranti, lu l'era stat qua ne la so tera a far el contadin.
Un dì, Nando co queli de la so classe l'è ’ndat in gita a Milan; fintanto che el vardéa el Duomo, l'intende ’na os e ’na parlada conosseste, el se olta, no el ghe credéa... ghe n'era la Maria, la toseta che ghe ’vea bravà par via de le zhariese e che lu el véa dit de maridar!
La era la pi bela tosa che l'aesse mai mirà: mora, alta, ben vestida... Ma no l' era stata tanto la os, a farlo oltar, bensì el dialeto che la parléa, el so dialeto. Catar una de la so tera a Milan, l'era un arte grant, e che la fusse proprio la Maria, no el podéa èssar altro che destin!
Maria e Nando i s'à sùito cognossest e recordà el fato de le zhariese; Nando da galantomo, l'à mantegnest la parola e maridà la Maria che ben contenta l'è tornada co lu a Revine. Reparada la vecia casa, i è stati là par ani e ani, co i fiòi e neodi. Tuti ghe voléa ben, parché brave àneme, lori i à volest ben a la so montagna, a ogni fil de erba, a ogni bestia, a ogni sass... cussita na olta lassà ’sto mondo, squasi insieme, se à volest recordarli; eli là tirài dó ben, ente la fotografia che i se strenze la man. Gran bela dona la Maria e galantomo el Mario...”
La storia xe finìa qua, el vecioto se ga sentà su ’na bancheta, el can se ga dà ’na gratada, po’, butando frégole de pan a i pesseti rossi che nua ne la póssa de fassa a la ceseta e vardando la casa de Nando e de la Maria che ancora xe là, el ga spetà che vegnesse sera.
Zo più in basso ne i laghi de Revine, se specia el Col Visentin, el Pian de le Fémene co la ceseta de la Madona de la Neve; l'eco de la so canpanela la ga ancora storie da contar.

[torna sopra]