|
Bruti scherzi
A le porte del Paradiso
 | | Se conta che un dì, Berto, co 'l so caro... |
Questa me la ga contà me cugnà Bruno: la xe na storiela che nel so paese, Borgorico, vigneva contà su Berto, na figura particolare.
Se conta che un dì, Berto, co 'l so caro scalcagnà pien de sachi stracolmi el jera direto verso el Lusone, tignendo a cavessa i bo inquieti. A un serto punto, Berto ghe pareva de èssare rivà a le porte del Paradiso, dove lo spetava San Piero. El vecio santo, co' i cavéi bianchi e la barba longa che ghe rivava a la panza, el ghe dimanda cossa che 'l ghesse in chei sachi e Berto, girando la testa e sbassàndosse el capelo su la fronte, squasi par scóndarse, el ghe dise che purtropo i jera pieni de biasteme e resìe tiràe ne la so vita.
"Ahi, ahi!..." risponde San Piero, tiràndose la barba, "ma quante ghin'eto tiràe!?" Berto alora, sugàndose i suori co 'l fassoleto che 'l gheva al colo, el ghe risponde che jera tante le ocasion che capitava, laorando in canpagna: le mosche che te core sù e zo par la facia suà, i barbastreji che i svola bassi in stala, i bo có i se inmula e no i vole pi 'ndare 'vanti..., e zo na biastema par confermare quelo che 'l jera drìo dire. San Piero alora ghe dise:
“Te lo sè, Berto, che biastemare a xe un pecato grave? No te si miga stà a catechismo da putèo?" Berto, sbassando la testa, el ghe conta che na volta ghe ne jera sbrissà una in cesa e el pàroco, lo gheva parà via de bruto e co maniere pesanti; da alora el ga sercà de stare al largo da i preti. San Piero, vardàndolo co tristessa, el ghe dise che a chel punto sarìa stà mèjo che 'l girasse el caro e che 'l tornasse indrìo fin al cancelo pi soto dove ghe jera na caverna scavà su la montagna.
"A so' 'pena stà!" risponde Berto.
"E cossa te gai dito?" el ghe dimanda San Piero incuriosìo. El poro Berto el ghe risponde che i ghe gheva fato na gran festa có i gheva visto el cargo che 'l portava e che el capo, quelo co i corni e el forcon, dopo 'verlo saludà, el gheva ciamà raquanti de i so scagnossi; dopo 'verse parlà tra de lori e ridendo, a ghe xe stà dito de 'ndare sù fin al cancelo azuro insima a la montagna e, 'pena rivà, de saludarghe San Piero. El vecio da la gran barba bianca, dopo 'ver scoltà Berto el ghe risponde che là el jera el Paradiso e soto jera l'Inferno.
"Me ne so' incorto!" risponde Berto. "... Là no i me ga dà gnanca na giossa de aqua co 'l caldo che faseva e qua, co lu, a me sento ben!" San Piero alora el ghe dise: "Caro Berto, quelo soto no l'è un parco co' le giostre, ma l'Inferno co 'l fogo eterno che no se stua mai." Pensàndoghe su, Berto el dise de ricordarse de tuta chela zente che sigava, del fogo che vigneva fora da la grata, de la spussa de costesine brusàe, de i bestioni co i corni e co' la coa e el forcon in man. Alora l'Inferno no jera proprio na invension de i preti, el ga pensà. "Ma, chel bestion... el jera Belzebù?..."
San Piero el risponde che purtropo chel bestion el jera Belzebù, el diavolo in persona, e che 'l se gheva servìo de lu, Berto, par farghe un scherzo. Lo gheva infati manda sù co 'l cargo che savemo e co l'incarico de saludarghe San Piero. Berto xe restà a boca verta:
"Farghe un scherzo?... A lu?... E mi... mi cossa fàssoi 'desso?" San Piero, vedéndolo cussì inmagà el ghe risponde:
"Anca massa, caro Berto, la to strada la xe oramai segnà, la xe quela che te ghè selto de fare e che te ghè fato fin 'desso so la to vita."
Berto gavarìa volesto ribàtarghe, ma el veliardo, vardàndolo in te i oci, el ghe dise che oramai no ghe jera pi tenpo, che ne la note el gheva fato un infarto e che 'desso el jera davanti a lu proprio par quelo. Robe da fare naltro infarto! E Berto no ghe voleva crédare:
"Morto mi? No ghe xe pi tenpo? Nò! El xe tuto un scherzo." Pensàndoghe ben el tira le conseguenze: se 'l xe morto no ghe speta che l'Inferno.
Vedéndolo cussì sbatùo, San Piero ghe dise che 'l podeva almanco confessarse prima; xe stà alora che Berto ghe ga risposto che el prete la gheva co lu par un scherzo de gioventù e che 'l jera talmente cativo che ogni volta che 'l lo catava el gavarìa volesto spelarlo vivo.
El poro Berto el sente come na gran confusion, vosse che lo ciama, man che lo s-ciafesa, chi lo tironava: "Ma questa no la xe la vosse de la Elvira, me mujere!" dise el malcapità.
Verti na s-cianta i oci, l'omo el vede la Elvira che ghe dise de svejarse e in fianco de ela ghe xe un sior co na barba bianca che lo vardava.
"Se la me dise de svejarme, vol dire ca son in leto!" e verti i oci el se rende conto de èssare distirà sul so leto e che l'omo ghe tastava el polso. Intanto, l'omo da la barba bianca, sentà sul leto lo varda e el ghe dimanda se 'l se ricordasse gnente del dì prima.
"A so' el dotor Pinela, no spaventarte: ieri, tornando da i canpi, tirando i bo co ’l caro pien de sachi de formento, a te ghè ciapà un colpo de sole, te si svegnù e te savariavi: te ricòrdito gnente?"
Ancora mezo inbaucà, Berto ghe dise che i sachi no i jera pieni de formento, ma pieni de bias... teme. El dotore alora el ghe risponde de no sforsarse a ricordare, de sponsarse e de stare tranquilo che a la matina drìo el sarìa tornà a védarlo. Restà solo co la Elvira el ga verto ben i oci fin che la mujere la ghe meteva su la fronte na pèssa bagnà par sercare de farghe passare la fevre.
"Te savessi, Berto, la paura ca te ne ghè fato ciapare, a te parevi morto!"
"Te savessi quela ca go ciapà mi!" risponde Berto.
La note jera passà tranquila, Berto se jera svejà ancora na s-cianta confuso, vardàndose 'torno, el xe 'ndà fora soto al pòrtego, in stala i bo i jera distirà e i dormiva ancora, el galo de i Pegoraro cantava e Berto, vardando i canpi, co' tuta la voze che 'l gheva in corpo el ga sigà:
"A so' vivo!... A so' vivo!..."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Dovemo salvare la dona!
Siè done copà in te na setimana: la xe na roba che no sta né in celo né in tera. La xe na guera che ne incioda tuti a le nostre responsabilità. L’omo xe drio deventare el “coronavirus” de le done. Dovemo afrontare seriamente el problema, senza “se” e senza “ma”. Ma subito!
de Mario Sileno Klein
|
