Da Verona

Far pratica

El molin l’era piassà su l’Àdese fin dal 1920.

El molin visto da vissin.

Me cusina Lucia la gavéa da darghe la seconda passada de scoa a la corte.

Me cato con la me amiga inte l’anbulatorio del dotor. Ne scade le ricete de le medissine più o meno i stessi giorni a tute dó e alora ne demo apuntamento lì, cosita, fin che spetemo, ciacolemo tra de noantre e el tenpo el passa in pressia. Par dirla tuta, piassè de na ’olta ne semo fermè nel so studio, anca dopo aver fato le ricete e un dì s’érene talmente ciapè da le ciàciare che el dotor che l’avéa finìo le visite el n’avaréa inciavà dentro se no l’avesse sentìo ruzar in sala de atesa.
Staolta gnente basi par via de la coa de l’influensa, che speremo che la ghe daga un tajo parché oramai la n’à batesà tuti.
“Èto visto che bel dotoreto nóo che ghe dà na man al nostro? El m’à dito che l’è invià a far pratica” taco mi.
“El sò, bela. Ancó l’è cosita: se studia, se inpara la profession sul canpo e po’ s’è àbili al laoro. Avocati, farmacisti, ingenieri, mecànici… i ga da far pratica e, a propòsito de pratica ghe n’ò una de bela da contarte…” e la parte con n’altra de le so storie.
“Donca, quando s’era zóina staséa inte la casa ’ndo’ ghera anca el molin, che fin alora l’era piassà su l’Àdese e che me nono l’avéa trasferìo lì nel 1920. Insieme a la me fameja vivéa anca un parente a la lontana che l’era stà deportà in canpo de concentramento e l’era scanpà par miràcolo. Dopo èssar stà liberà, i l’avéa messo sul treno par Verona e i avéa avisà i parenti che, quel giorno lì, i s’avéa acanpè in stassion par ricévarlo in ponpa magna. Ghera mezo paese a spetarlo in stassion… Man man che desmontàa i ex prigionieri, i so amici i sigàa: – Tonon! Tonon! – El saréa stà Antonio ma i le ciamàa Tonon parché l’era un tarussoto. Sto porocan el riva, el se strapega su na bancheta de la stassion, el sente che i le ciama ma no’l ga gnanca el fià par rispóndar, quei altri i le vede ma no i le conosse più e a note fonda i lea le tende e i rientra a casa. A la matina dopo Tonon el riva sul careto del castaldo che el l’avéa visto e riconossù dal caso. Tonon difati, oltre che ingiassà, l’era talmente patìo che el s’avéa reduto pèle e ossi che el paréa parfin che el se fusse scurtà. L’era anca tanto malà perciò no l’à più podùo laorar. L’è restà a casa nostra par tuta la vita, senpre con na slorda de prima e, sicome prima de partir par el fronte l’avéa fato i studi alti e no’l voléa far el mantenuto, el daséa na man a la so maniera e cioè spassando dó ’olte al dì la corte denansi al molin e contando i schèi che vegnéa sù da la botega. No l’à mai volùo parlar de la guera e quando gavemo avùo un butel tedesco, amigo de me fradel, òspite a casa nostra, Tonon el s’à serà in càmara e l’è restà inciavà dentro par tuto el tenpo. E sensa magnar. Tra el s-ciapo de buteleti che zugàa davanti al nostro camilion, Tonon l’avéa catà fora dó aiutanti: me cusina Lucia par la corte e mi par i schèi: ela la gavéa da darghe la seconda passada de scoa a la corte e mi contar i schèi che l’avéa za contà lu, ligar le massete con l’àstico, métarghe sora un bilietin con la cifra. Tuti i giorni sto mengo e no ghè mai stà difarense tra la so conta e la mia. S’era a la fine de le medie quan che l’è morto e…”
La interonpo: “Scusa, ma cossa ghe éntrela sta storia co ’l far pratica?”
“Te ghè reson” la ritaca ela. “Tonon el diséa che me cusina l’era gran bràa a spassar la corte e mi altretanto bràa a contar i schéi e a far le più e che tuta quela pratica che avemo fato par mèrito suo un doman la saréa vegnùa bona. E el ga intivà.”
“Come?” ghe domando.
La me amiga la me risponde de paca: “Me cusina Lucia la laora con sodisfassion ne n’inpresa de pulissìe e mi ò fato la ragioniera!”

[torna sopra]