Da la Lessinia Centrale (VR)

Piture murali ’n Lessinia

Antica Crocifissione con Maria.

Na bela Madona: Virgo Lauretana.

Eco na bela e antica trilogia.

Na comovente Madona Adolorata.

Le piture murali ’n Lessinia, ’n tanti i à proà a contarle, a registrarle, ma ghe n’è dapartuto. A próa de coel che digo, conto che ’n me amigo, che ga inpresa de muradori, ghè capità de ristruturar na stala con pòrtego e teda, che l’è tuto drìo cascar; ghè stà dito:
“Ti, fa coel che te disemo, no’ sta’ parlar con nissuni de coel che te vedi su i muri piturà, te salvi coel che te disemo noantri e fa’ ’l laoro a opera come ’l va fato.”
’Sto laoro da far, l’éra là ’nte na spersa casa, là ’n tanta malora su par i monti de ’sta nostra tera, la Lessinia.
Lu l’à volù dìrmelo, saèndo che a mi ’ste robe le me piase assè.
Cossì na festa de matina bonora sen né a védare. La teda la ghéa ’n muro, coel pi riparà da l’umidità, con tre de piture de du santi e na Madona, ancora ben conservè.
Dopo ghe n’éra soto ’l pòrtego, ma i éra mal conservè e dopo le ghéra nel muro de l’entrata, e, ’nte na capelina mal messa, de fronte a la porta de la casa.
Son restà sensa parole.
Tuto coesto par dir, che dapartuto ghe n’è de piture murali.
Ma su nel’Alta Lessinia, là ghe n’è tantissime; zo pi basso da le me parte, ghe n’è, ma manco. La magioransa jè Madone Adolorate.
Da ci èle stè fate ’ste piture?
Ghè n’è coalcheduna che ga la so firma, tante altre jè sensa,
A parole tramandè ne i sacrosanti filò, le ga la so storia, storie varie, come coele che ghè chì ’nte sta contrà.
Un omo che éa fato ’l soldà con mi, e che ’l staséa ’nte na contrà spersa su par la Lessinia:
“Dosento ani fà – ’l me diséa – s’éa fermà chì ’n pitor che ’l vegnéa da i monti de Vicensa. Lu ’l pituràa Madone par ’n piato de minestra. Sto pitor e ’l dorméa su par le tede, e l’è stà chì ’n giro par diversi ani.”
Altri i éra artisti de passajo, ma ’l passajo l’éra da april a otobre, e la paga po’, su parzo, l’éra senpre la stessa: minestra o polenta o na scudela de late.
El fato l’è che ghe n’è de bele opere, anca parché jè stè ben conservè e adesso se no’ jè ’n coalche casa o contrà abandonà, le torna ben tegnùe e le resta vive.
Al de là che ghe sia, come paroni o coasi, òmeni de cesa o no, ’l fato l’è che le resta o le torna intocàbili, almanco gran parte.
Diséa che jè tante Madone, ma dopo de le Madone ghè: Sant’Antonio Abate, Sant’Antonio da Padova, San Bovo, San Vincenzo Ferrari, San Michele Arcangelo, tanto par dir de le pi.
Ma anca de Madone ghe n’è pi de una: la Madona de le Grazie, coela del Rosario, coela de i Sete Dolori, coela de la Misericordia, ma ghe n’è tante altre, come tanti Santi.
Comunque, su ’ste piture, ghè tanti discorsi, pi o manco credibili, ma la bela realtà l’è che le piture le ghè; tante par mi jè belìssime, tante jè ’nteressanti, e po’ tute le ga on coalcossa da dirte, da farte capir che chì ghè stà de la gente che i vivéa del so laoro e de na grande fede.

[torna sopra]