Visti da vissin

Emma Borsetto Pizzolato
Trovar la vena par scrìvare ne la terza età e comunicare i propri ricordi

La siora Ema drio mostrare la fotografìa del marìo

Quel folio desmentegà su un tavolo de la biblioteca gaveva atirà le me curiosità e cussì lo go leto. La gera na bela storia quea scrita da la siora Emma, che la testimoniava el ricordo de un giorno particolare de tanti ani indrìo.
Go avùo sùbito voja de conóssare sta persona, e domandarghe se podevo publicare el so raconto. La me ga acolto ne la so casa a Bassan, proprio rente el Ponte dei Alpini; la me spetava, in conpagnìa de na so amiga, come se convien na persona de sesto.
Gavemo ciacolà par un bel tòco e de raconti ghe ne sarìa vegnù fora raquanti, parché in tuto la saveva métare in mostra la unicità del ricordo. La ze afessionà a la freschessa del so dialeto che, el ze de sòlida base venessiana de Cannaregio, ma che el tempo ga inbastardà co queo de teraferma, de mira Porte, prima, e de Bassan, dopo.
Mi devo èssare sincero e dirve che sta "scritrice" casalinga le me ga imagà, ma no vojo condissionare nissuni e par questo a vegno sùbito al raconto come che lo ga scrito ela, anca co la zonta finale, co tanto de firma.

29 DICEMBRE 1940, giorno del me matrimonio

Da quel dì che me son maridà più de 60 ani xe passà, me par che sia stà ieri parché non me desmentegarò mai quel che me xe capità.
Quanto fredo e quanta neve ghe gera par tera, parché a quei tempi i inverni i gera proprio rìgidi: 'a neve restava par mesi su 'e strade, ma el fredo ancor de più dentro in te 'e case.
Come se, in quel giorno, questo no 'l bastasse, se gera messa anca 'a Cesa che a quei tempi 'a gera molto severa: se voevo fare 'a Comunion dovevo stare a digiuno da 'a mesanote.
E mi el giorno prima no' gavevo magnà quasi gnente al pensiero de abandonare el me paese par andare a vìvere a Bassan e tanto manco gavevo dormìo ne 'a note par l'agitassion.
E così mi, pòvera sposina, son rivà in cesa a 'e 11 de 'a matina, sbasìa, sfinìa, tanto emossionà e con i brìvidi che i me 'ndava su e zo par 'a schena.
Dentro in cesa ghe gera più fredo che fora e mi gero deventà dura come 'a statua de 'a Madona che gavevo davanti.
"Signore - go cominçià a dire - fa' che sta messa finissa in pressa". Gavevo na siera adosso come de una che d'inverno vien sù dal fosso sensa gnente indosso. Finalmente 'a messa a xe stà finìa, ma apena rivà su 'a porta de 'a cesa me trovo n'altra rassion de fredo; ghe gera pronto el fotògrafo che 'l ga cominçià a dire: "Metetevi tuti in posa". E mi, dura come un steco, me ga tocà farghe anca un soriseto. Pensavo: "Adesso 'a sarà finìa". Ma no xe stà cossì parché tra métarse 'a strassa nera in testa, dirne ogni momento: "Pronti... pronti" e strucare el pereto de goma el ga tirà 'vanti un bel tòco.
Finìe 'e foto, se semo saludài, parché a quei tempi i parenti i gera tanti, ma i schei pochi, e ognuno xe andà pa 'a so strada. E mi, sensa métare gnente soto i denti e ancora a digiuno da 'a mesanote, son 'ndà co' me marìo in stassion.
Rivài a Padova se sentimo ciamare e mi gó dito: "Varda che gentìi quei de 'a tratorìa, i ne ga mandà a tore". Alora montemo su 'a carossèa e mi, tuta contenta, go dito. "Adesso finalmente 'ndaremo a magnar qualcossa. El cavaeo però no 'l voeva più partire; poareto, forse el gaveva più fame e più fredo de mi.
Dopo un poco che 'ndemo a spasso ghe domando al paron del birocio: "Sior, quanto ghe manca a rivar a sta tratorìa?"
E lu el me risponde: "Mi, siora, no centro gnente co'a vostra tratorìa. Mi son adeto a fare el giro panoramico de 'a cità".
Alora mi ghe rispondo: "A mi no me interessa proprio gnente de védere el panorama; noialtri gavemo bisogno de magnare!".
Finalmente el ne ferma a sta tratorìa e gera za i do boti. Apena che go visto el cameriere no go spetà che 'l me diga cosa che desidero, ma ghe go dito sùbito: "El ne porte in freta na minestra bea calda". E quando che 'a go vista 'rivare me son sentìa ressusitare. Ma nel più beo che so' drio a métare in boca el primo cuciaro de minestra, riva el segnàe del giornàe radio e sento dire: "Signori, per ordine del Duce, tutti in piedi! Vi trasmettiamo il bollettino di guerra."
E anca mi go dovùo alsarme in pie anca se ormai me sentivo cascare par tera, Intanto 'a minestra se giassava e 'e me gambe 'e gera più congeàe de quei che gera in guera. E go pensà: "Se questo - come i me ga dito - el xe el giorno più beo de 'a me vita, come sarài i altri?"
A onor del vero devo dire che i altri giorni i xe stai mèjo. Ma qua cominçia 'naltra storia che ve contarò 'naltra volta.
Mi sono dimenticata di aggiungere che ci siamo sposati in fretta per non pagare la tassa del celibato; imposta del Duce.
Cordialmente

[torna sopra]