|
Editoriale
Se se vole la pace...
No se pole parlare de pace co le armi in pugno: bisogna prima farla nàssare ne la nostra testa, nel core, ne le case, ne le fàbriche...
 |
| Fémolo almanco par lori... ch'i possa créssare in pace. |
Vista da l'alto de la me età, anca se mi son otimista, me pare de poder dire che qua la xe tuta na guera: da i raporti personali tra de noaltri ai pensieri che ne boje drento e ne porta via i sòni; da i fiòi che ne fa conbàtare a le poste che no ne recàpita in tenpo decente létare e giornài; dal confronto, o mèjo, scontro tra i rapresentanti de le diverse forze polìtiche a la guera tra le corenti sindacali che dovarìa fare l'intaresse de chi laora e invesse le porta aqua a qualche altro molin; da la batalia del "caro-vita" a le proposte de la publicità che quasi le te òbliga a canbiare magnari, vestiti, màchina, aredamento, sesso, sanpo, sacraméscola...
Par no parlare de l'informazion e de le imàgini televisive. El xe senpre chel'argomento: la guera nel mondo, preparativi de guera, la guera al governo, guera de religion, guera de mafia o de andràngheta, guera ai clandestini, guera a la prostituzion, a la malavita, a la coruzion, guera a l'evasion fiscale e, qualche volta, guera a la guera... co girotondi, cortèi e fiacolate noturne. E par fortuna che ghe xe anca sta guera!
Da tuto sto parlare de guera e sto mostrare imàgini de guera, vèra o ne i film, come se fa a vegnérgane fora e ricavàrghene un conceto de pace? La pace xe el rifiuto de tute ste proposte de guera, de violenza, de aroganza, de vendeta, de potenza distrutiva de le armi!
Se se vole la pace, se se xe convinti che la xe un ben necessario par tuti, bisogna vìvare e far vìvare la cultura de la pace, partendo da l'educazion a la pace. Bisogna che tachemo noaltri adulti a mostrare esenpi de pace ai più pìcoli.
Do robe inportanti, penso che ocora fare:
1) dichiarare guera a tuto quelo che ne fa passare come necessaria la guera fata co le armi, ma anca a ogni altra forma de violenza, de scontro, de cativeria, inconprension, antipatìa, dispeto, ricato, invidia, intoleranza, inpazienza e indifarenza;
2) fare un passo indrìo e tirar fora dal granaro un poche de chele sane tradizion e usanze che ga fato parte de la nostra vita de ieri e che ne xe stà robà, drio la màscara del progresso e del "'desso xe moderno cussì", soto el travestimento de la comodità e del "no se usa pi". L'è stà un Carnevale che xe durà poco, e dopo s'emo catà pezo!
Calcossa se sta movendo in sto recùpero del "come eravamo", ma no 'l ga da deventare na moda o na stajon provisoria, semai na bandiera che ga da sventolare sora de tuti e par tuti, parché la pace no ga da 'vere colore polìtico, sindacale o religioso.
Tuto questo dipende dal pensare la pace, dal capire la pace e dal volere la pace, parché no ghe xe pace se no se se mete in testa de acetare, anca solo in parte, le idèe de i altri, la volontà,
i difeti e le virtù de i altri. No vedo altro modo par poder dire: "La pace sia con tutti voi", veramente!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Febraro:
Editoriale
Se se vole la pace...
No se pole parlare de pace co le armi in pugno: bisogna prima farla nàssare ne la nostra testa, nel core, ne le case, ne le fàbriche...
de Mario Klein
Da Verona
El Pantheon a Santa Maria in Stele
a cura de Wanda Girardi Castellani
|
