|
Da Maran Lagunare (UD)
Sento proverbi sento...
 |
| Veduta panoràmica de Maran. (Foto archivio parochial) |
- Se piuvi el zorno de S. Vincenso (22 Genaio) che 'l xe sora la ua, vol dì stajon crua e poco se sua.
- Febraio el vien col giasso, el va via col sol.
- Quando che a Marso tona, la vendema sarà bona.
- In April, miti la foja anca el mànego del bail.
- Magio, de scovèrzete va adagio.
- Giugno secheto, erba a sacheto.
- A Lulio dal caldo tiente saldo.
- In Agosto inpignissi la cusina e la cantina.
- 7 Setenbre, S. Regina, el caligo fuma de matina.
- Otobre el xe bel, ma tien pronto l'onbrel.
- 1° Novenbre, i Santi, capoto e guanti.
- Dicenbre gelò, no 'l va dispressò.
- Un bon ano el xe sensa afano e sensa malano.
- Chi paga el dèbito, aquista crèdito.
- El mercato lo fa chi conpra e chi vindi.
- Se ghe xe el sol cò la luna niova, par un tòco niente piova.
- Presto in pescarìa, tardi in becarìa.
- Se se ìmita la formiga, se vivarà sensa fadiga.
- Sintì 'na canpana sensa l'altra, la suna mal.
- Se l'orto no bivi, la zente no magna.
- Xe più gioja dà, che riceve.
- Ciàpa el ben quando che 'l vien, e no quando che convien.
- La vita ben spesa la dà serenità in te 'l murì.
- Se el marmo el sua, umidità rua.
- La verità e l'ojo, i vien senpre a gala.
- Luna sentada, marinajo in pie.
- La casa de i continti, i ga ancora de faghe le fondamenta.
- Omo vivo el paga.
- Cò le bisteche le ga i nerviti, se deventa nervositi.
- L'arcobalen porta seren.
- Sento teste, sento opinion. (Opur) Tante teste, tanti capèi.
- Se fu, no sarà mai più.
- La leransa al matin la xe oro, a mesozorno la xe arzento, a la sera la xe pionbo.
- A fà del ben senpre convien.
- Se te piase vive san, vistìsete caldo e magna pian.
- Poca zente, bona festa.
- Omo che 'l sparagna de vecio no 'l se lagna.
- La superbia la va in carossa, ma la torna a casa a pie.
- Ancùo semo, doman no saremo.
- Chi del suo dà, Dio ghe lo ridà.
- Più che un fusto, la dona serca l'omo giusto.
- Ponto longo e mal cusìo, doman discusìo.
- Punti longhi e mal tirài, doman sbregài.
- A dì busìe, ghe vol 'na bona memoria.
- Siroco de matina, sporco in marina.
- Cò l'amo se ciàpa el pesse, l'omo cò l'interesse.
- Se la barca la xe rota, no servi la sèssola.
- L'omo che 'l parla sensa criterio, el buta a fondo un bastimento.
- Luna niova, portafolio pien, porta ben.
- Xe mejo gesse paruni de 'na sèssola, che òmini de 'na nave.
- Un scalin a la volta, se fa la scala.
- Par un bon perdonà, bisogna desmentegà.
- No sta mai sbate la porta dadrìo de ti, che te pol desiderà de vèrzela.
- Ogni busa ga la so scusa.
- Quando che se lava, se scumissia cò un fassoleto e vien fora un cavaleto.
- Par ben lavà ghe vol lissia, savòn, e sugo de comedòn.
- Val più 'na bona piegada che 'na stirada.
- Dì e parlà se perdi el mèrito.
- Se consuma prima el scòvolo, che la scafa.
- Chi che segui par fil e par segno la moda, se vistissi in màschera e oltre che perde del suo el se vistissi de ridìcolo.
- I schei no i ga le ganbe, ma i scanpa da le man.
- Cò fis-cia la recia o spissa el naso, posta in viaso.
- Piutosto de parlà a vànvera, xe mèjo tase.
- Chi no paga de testa, paga de ganbe.
- Cò l'andà de i ani Giovanin diventa Giovani.
- La Messa la xe longa se xe poca devossion.
- Se te vol rispeto, porta rispeto.
- El vin del fiasco a la matina el xe bon, a la sera guasto.
- Xe mèjo che vansa, che gnanca che manca.
- 'Ndove che ghe vol fati, no basta parole.
- Le cause le vinci chi che no le fa.
- El pare fa la roba, i fioi i vindi.
- In casa strinzi, in viaso spindi, in malatìa spandi.
- Sta' vissin a chi che ga un dolor, e confòrtalo se te pol.
- No pol gesse giutò, chi che no vol gesse consiliò.
- L'omo el ciapa sù, quel che 'l ga semenò.
- 'Ndove che manca in natura, el Signor procura.
- Cò xe fato, no xe più de fà.
- Biancarìa che vansa, metèla in t'un cantòn: giovarà un mal de pansa.
- Vestiario che vansa, metèlo in t'un cantòn che vien la so stajon.
- A sete ani se xe putèi, a setanta ancora quei.
- Bon mercato, sbrega la borsa.
- Bisogna fà la spesa, secondo l'entrada.
- Xe mèjo no dì, che scumissià e no finì.
- Se te vol gesse vardò basta 'ndà a Messa cò xe scumissiò.
- Amor sensa barufa, fa la mufa.
- El rumor no fa ben, el ben no fa rumor.
- De le volte 'na busìa, salva 'na verità.
- Vòltete senpre indrìo par védeghene de pèso.
- Chi che ga fortuna in amor, no la ga al ziogo.
- La pase in casa, no xe oro che la paga.
- Tre zurni de caligo, el quarto ciama bora.
- Rosso de sera e ciaro de matina col sol, ralegra el pescaòr.
- Quando che 'l gato se lava le rece, piova a sece.
- El vento forte, el porta via anca le òrcole.
- Oci bisi paradisi, oci mori rubacuori, oci celesti i fà inamorà, oci bianchi no i xe de copià.
- Onestà de boca, val tanto e poco costa.
- La lengua che sparla no la ga osso, ma la rovina a più no posso.
- L'ocasion no fa soltanto l'omo ladro, ma anca bravo.
- Che la vaga mal o che la vaga ben, la vita bisogna ciàpala come che la vien.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Marso:
Editoriale
Pati ciari... amicissia longa
Xe ora de métar zo piere de confine tra le sfaciate pretese de i "diversi" e la normalità de chi vive... come dio comanda!
de Mario Klein
Da Belun
"Promossa a l'Asilo"
de Luigina Tavi
|
