|
Da Lendinara (RO)
Mai più in sto posto!
 | | Can del tron, su zento euri el ga ’vù corajo de tiràrgane via venti. Mai e mai più in sto posto! (ne la foto, I Bonbasini) |
– Pronto! Chi parla?
– Ciao, so Alessandro, sito libaro stasera? Ghe xe da sonare a ’na festa intel restorante che te go dito ieri sera!
– Sì, so’ lìbaro.
– Alora se trovemo a le siè e meza pa’ métare ben i strumenti. Ciao.
A le siè in paca me fazo trovare sol posto stabilìo, dopo aver baucà pa’ trovare el restorante ficonà in mezo a le brècane. Tra i àlbori alti e onbrosi, sparpajà pa’ la corte, ’na bèa casa de canpagna co’ vizin la stala ancora più bèa se presentava a la me vista. Un giardin fiorìo co piante in grandi vasi, statue e veci atrezi agrìcoi sparpajà dapartuto, meteva un zerto intaresse a chi lo traversava.
Sora i coèrti de le costruzion, raquanti pavoni, fasendo la roda, inviava de tanto in tanto de i zighi infernài. Curioso de savere come che la gera indrento sta fatorìa, so’ entrà e la go spiocià da zima a fondo. Ve digo che ’l posto xe da siori.
– Che belo che sarà sonare qua drento! – go pensà.
– Nò! Qua no se sona, stasera i ne ga sistemà a l’aria fresca, de là de la strada, vizin al parchejo de le otomobili.
De là de la strada, ghe xe un lagheto co’ intorno pìcoe montagnòe coèrte da sgiavaschi verdi e bassi àlbori ornamentài, zoghi pa’ i putini e, tra i trodi, ’na ventina de grande tende bianche. A le oto e meza scuminziava vegner zò le prime onbre e, ’torno a l’acanpamento se provedeva a inpizzare le fiàcoe: I clienti, col so trantran, ciapava posto soto le tende ’luminà da le lanpare colorà.
Nantri però no gèrimo pronti a far musica, parchè sistemà su la tera mal gualiva, no trovàvino mai un sicuro posto da piazare el legìo o altri strumenti ca gavévino drio. Gera tuto un su e zò e po’, de tanto in tanto, se gratàvino la pèle da i becoti de zanzare che ne davà no poco fastidio. A farla curta, quando ghemo scuminzià a sonare, che gera za le nove passà, lo ghemo fato al scuro. No se vedeva un pipio e solo dopo le nostre proteste col paron, i ga provedù a far luse.
In pressia, un nùgolo de zanzare se ga messo a sponciarne facia, brazi, man e chi gaveva i sàndali anca i piè, tanto che inveze de sonare piciàvino sora ste bestie infame, e gratàvino a la grande. Mi po’ che dovevo cantare, ghe ne magnavo a sboconà ca no ve digo e, dopo raquanti minuti, go rinunzià a vèrzare la boca pa’ el resto de la serata. Intanto drento a le tende, difese da i veli e da l’odore de le sostanze chimiche, la zente magnava e ciacolava tanquila. I camarieri in guanti bianchi i portava co sèsto, novi piati de magnari, e le botije le s-ciocava a l’“evviva” de la zente. Nantri, co la panza voda ma pieni de becoti, li tegnévino vardà che squasi ne vegneva da piànzare.
A fine serata, muciàvino sù le nostre robe e dopo averle caricà sol camionzin, semo andà dal paron del locale pa’ tirare la nostra paga.
– Cossa disìo, putèi, se fasemo un sconto de venti euri? Go tante spese!
– Can del tron, su zento euri te voi tiràrgane via venti, dopo tuta sta sofarenza? (ma lo ghemo solo pensà e, tirà i schei da sto tirchio, se ghemo lontanà, segnàndose co la man drita e quela zanza, co la promessa:
– Mai e mai più in sto posto!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Schei, schei, schei…
Quei che no ghe xe e quei che se perde par strada, quei che no riva mai e quei che finisse massa in pressia, quei goadagnà onestamente e quei ciapà, inbrojando el prossimo…
de Mario Klein
Da Rovigo
Parlando co Loris
de Gianni Sparapan
Da Thiene (VI)
Le rogassion
Un contato direto de l’omo e de la natura col so Creatore
de Bepin Daecarbonare
Da Verona
San Zen in Oratorio
de Lucia Beltrame Menini
|
